காதல்..

காதல்
இரு மனம் கலந்து
வெளிவரும் உணர்வு
இரவெல்லாம் அழுதால்
அதிலேதோ தவறு...

காதல் என்ன கத்தரிக்காயா
சமைத்து ருசி பார்க்க?
கண்களுக்குத் தெரியாத‌
கண்ணீர் துளிகள்...

காயாத நினைவுகளின்
காய்ந்து போன வடுக்கள்
காலச்சக்கரத்தில் சிதைப்பட்டு
கன்றி போன காவியம்...

பல‌ சச்சரவுகளிடையே
சமாதியாகி போன‌
என் காதலுணர்வை‍‍
நீ...
மலர்வளையம் வைத்து
மறுபடியும் உயிரூட்ட‌
உணர்கிறேன் புது வலி,
உள்ளமெல்லாம் உயிர் வலி...

கண்ணீர்

ஆண்டவனிடம் கண்ணீர் சிந்து
அருள் மழை உனை நனைக்கும்,

அடுத்தவனுக்காக கண்ணீர் சிந்து
அன்பின் அலை உனை அணைக்கும்,

அஃதின்றி

காதலுக்காக
கண்ணீர் சிந்தும் மானிடா!
நீ சிந்தும் விழி நீரின்
விலையறியாயோ?

கண்ணீர் என்ன கங்கை நதியா
வற்றாது உன் கண்ணில்
வழிந்தோட?

அதனை.....

அன்னைக்கு கடன் கொடு
ஆனந்த கண்ணீரில் உனை நனைப்பாள்

தென்னைக்கு கடன் கொடு
தேடி வந்து தாகம் தணிப்பாள்...

கார் முகிலுக்கும் கொஞ்சம் நீ கொடு
அகிலத்தை அடை ம‌ழையால் நனைத்திடுவாள்

ஆனால்.....

காதலுக்கு மட்டும் கொடுத்து விடாதே
காலமெல்லாம் கண்ணீரில் கரைந்திடுவாய்...

கால‌ங்க‌ள்

கருவோடு உயிராகி
உணர்வோடு உயிராகி
தாயின் மடியில் உலாப்போனது
வாழ்வின் நிலாக்காலம்...

"பேதை"பெண்ணாகி
போதை மொழிபேசி
பொலிவுடன் திகழ்ந்தது
வாழ்வின் இளமைக்காலம்...

"பெதும்பை"பருவத்தில்
பதுங்கியிருந்ததால்
பாதி உலகம் மறந்த‌து
வாழ்வில் வசந்த காலம்...

"மங்கை" நான் மலராகி
மணாளன் தோள் மீது
மயங்கி மகிழ்ந்தது
வாழ்வின் வசந்த காலம்...

"மடந்தை" பருவத்தில்
மழலையின் மொழியில்
மகிழ்ந்து குலைந்து கரைந்தது
வாழ்வின் பொற்காலம்....

"அரிவை" யாகி அனைத்தும் அறிந்து
தெரிவை பெண்ணாகி
தெளிந்து நிற்ப‌து
வாழ்வின் நிக‌ழ்கால‌ம்....

"பேரிளம்" ப‌ருவ‌த்தில்
பேர‌ன் பேத்தியுட‌ன்
பேரான‌ந்த‌ம் பெற‌‌ப்போவ‌து
வாழ்வின் எதிர் கால‌ம்....

வா என்ற‌ழைத்து
வ‌ருந்தி அழுதாலும்
வ‌ராம‌ல் போவ‌து
வாழ்வின் இற‌ந்த‌கால‌ம்...

முறையற்ற காதல்

[ஒருவர் ஒரு பொண்ணை விரும்புகிறார்...அந்த பொண்ணுக்கும்
அவரை பிடிக்கும்...ஆனால் அவர் அவளுக்கு அண்ணன் முறை..
அது தெரிந்து அந்த பெண்ணின் உணர்வுகள்]


காதலுக்கு கண்ணில்லையென்று
எனக்கு தெரியும்,
உறவு முறையும் இல்லையென‌
நீ சொல்லி தான் தெரியும்...

அழகாய் இருக்கிறாய்
என் அடி மனதில் இனிக்கிறாய்
ஆறடி எரிமலையாய்
என் ஆயுள் நனைக்கிறாய்...

மனம் திறந்து சொல்லாமல்
மறைமுகமாய் உணர வைத்தாய்
உயிரும் உட‌லும் உறைந்தாலும்
என் உள்ளம் ம‌ட்டும் உத‌ற வைத்தாய்...

தாம‌தித்த‌ கார‌ணத்தால்
த‌ங்க‌த்தை ம‌றுக்க‌ முடியாது
த‌ங்கையென்னும் அரிதார‌த்தில்
நான் அழுதது உமக்கு தெரியாது...

ம‌றுபிற‌வி ஒன்றிருந்தால்
மறுப‌டியும் பிற‌ந்திடுவோம்
அத்த‌ணை உற‌வு எதிர்த்தாலும்
அவ‌னியிலே ஜெயித்திடிவோம்...

புதிய‌ ந‌ட்பு

உன் அறிவில்
அதிசயித்த என்னை
ஏறிட்டு நீ பார்க்க‌
ஏற்பட்ட ஓர் தருணம்...

பத்தாண்டு
பலமொழியில்
பரிமாறா பாலப்பாடம்,
ப‌த்து நொடி விழி மொழியில்
ப‌சியாறிய‌
விந்தையென்ன‌...

காத‌ல் காம‌ம்
த‌ழைத்தோங்க‌,
தாவ‌ணி ப‌ருவ‌ம் என‌க்கில்லை..
தாயாய்,த‌ங்கையாய்
ஆன‌ பின்னே
என்னுள் வ‌ந்த‌ மோன‌ நிலை...

என‌க்கே தெரியா
பெண்ணொருத்தி,
என்னிள் இருந்த‌
இன்னொருத்தி,
என்றும் வ‌ருவாள் உன்னோடு,
உயிராய் 'ந‌ட்பு'ஒளியேந்தி......

வாழ்க்கை

ஓராண்டா....ஈராண்டா
இருபத்தி மூவாண்டு தவம்,
த‌டைப‌ட்டு போன‌து........
கல்லூரியில் கால் வைக்கும் முன்
காற்றில் சுழ‌ன்ற‌து
என் காலச் ச‌க்க‌ர‌ம்.....

ச‌ர‌ ச‌ர வென்றோடிய‌
வாழ்வில்
வசந்த‌மும் வந்த‌து,
வள‌மையும் தந்தது,
சிற‌கும் விரித்த‌து,
சிலுவையும் சுமந்த‌து......

இள‌மையை அட‌கு வைத்து
குடும்ப‌ம் தழைத்த‌து.....
த‌ர‌ணியில் த‌லைகாட்ட‌
தாழ்வு ம‌ன‌ப்பான்மை
என்னுள்
தாண்ட‌வ‌மாடிய‌து.....

மூழ்கிய‌ எரிம‌லை
மெதுவாய் மூச்சு விட‌
தாக‌ம் த‌லைக்கேறி
த‌மிழ் மோக‌ம்
என்னுள் "மேக்மா"வாய்
வழிந்தோடிய‌து
த‌மிழ் க‌ற்க‌ நினைத்தேன்
க‌ன‌வில் திழைத்தேன்...

இன்னர்வீல் நட்பு

என்றும் இணையில்லா
இன்னர்வீல் தொடங்கின‌
இருண்ட என் இதயத்தில்
மின்னல் பூ பூத்தன..

பெண்ணாய் பிறந்தேன்
புவியோடு வளர்ந்தேன்
கண்ணனுக்கு வாக்கப்பட்டு
கற்பனையாய் வாழ்ந்தேன்..

காட்டாற்று வெள்ளமென‌
கலமது சுழன்றோட‌
கண்ணிமைக்கும் நேரத்தில்
இன்னர்வீல் வந்தது
இனிய குடும்பம் தந்தது..

விட்டு போன உறவெல்லாம்
தரணியிலே சிதறியிருக்க‌
தானும் சென்று உதவிடும்
தாய்மை உணர்வை தந்தது..

நட்பு என்னும் தாய் வயிற்றில்
நாழும் பிறந்து சேயானோம்
தாய் இல்லா சேய்களும்
தழைத்தோங்க உதவிடுவோம்..

சாதி மதம் பல கடந்து
வயது வசதி தனை மறந்து
தனிமை சிறையின் விலங்குடைத்து
வானமளவு உயர்ந்திடுவோம்
நமக்குள் வல்லமை பல தந்திடுவோம்..

தாயாய் தங்கையாய் தரம் பிரித்து
தன் மன உணர்வை பகிர்ந்திடுவோம்,
தோழியாய் குழந்தையாய் குணம் மாறி
கூடி குலாவி மகிழ்ந்திடுவோம்..

கூட்டு குடும்ப‌ம் ம‌றையும் கால‌மிதில்
சுற்ற‌ம் என்ன‌ சொன்னாலும்
எந்த‌ சூழலில் மாட்டிக் கொண்டாலும்
இன்ன‌ர்வீல் குடும்ப‌ம் க‌லையாது
நாம் கூடி க‌ளித்து வாழும் வ‌ரை..

விழித்தெழு பெண்ணே!

பேதை பெண்ணே நீ
போதை பொதை பொருளாய்இருந்தது போதும்
பாரதி கண்ட புரட்சி பெண்ணாய்பொங்கியெழு..
புதுமையை
ஆடை குறைப்பில் காட்டாதே
ஆளவந்தவளாக உனை மாற்று...
சமமாய் தண்ணியடிப்பதில் காட்டாதே
சாவ்லாவாய் சாதனை புரிந்து நீ காட்டு...
அன்னை தெரசாவாக மாறி
அன்பினை காட்டு அனாதைகளுக்கு..
அப்துல்கலாமாக மாறி
ஆக்கம் பல புரி பாரதத்திற்கு..
காவிரி தாயாக மாறி
தண்ணிர் தந்து விடு தமிழகத்திற்கு....
கொலுபொம்மையாக மட்டும் இருந்துவிடாமல்
கோபுர கலசமாக உயர்ந்து நில்
நாளைய உலகம் நமது கையில்....

40+ காதல்.

காதல் வெள்ளோட்டத்தில்

கால் நூற்றாண்டுகள் கடந்தும்

கண்ணாமூச்சி ஆடுகின்றதே

நம் காதல்.....

என் கண்களில் தேடினாய்

உன்னை‍‍‍‍ - உன்

மனக்கண்களில் கண்டேன்

என்னை....

நம் காதல் தேசத்தில்

இலையுதிர் காலம் கூட‌

இள வேனிற் பூக்களை

தருகிறதே....

நரையோடி நடை தளர்ந்தும்

கடலோடு நான் கரைந்தாலும்

கலையாத பனியாக‌

உதிராத மலராக‌

உன் உள்ளில் நானிருப்பேன்

ஓரு காதல் தவமாக.........

நான்

மன்னவன் உனைக் காக்கும்
வெண்கொற்ற குடை நானே........
வேம்புனிலும் தேன் தேடும்
தேவதை பெண் நானே..........
திங்களோடு உறவாட‌
தினம் ஏங்கும் மனம் தானே........
தேங்கிடும் ஆசையினால்
தேய்கின்ற நிலவு நானே..........
தேயாமல் காத்திடுவேன்
தேய்ந்தாலும் உனை நானே......
தேடினாலும் தெரியாது
தொலைந்து விட்டேன்
உன்னில் நானே... ..

அமைதி கொள் மனமே.

மூவுலகையும் சுற்றி வந்தேன்
மும்மூர்தியை வணங்கி நின்றேன்
மும்மதமும் ஓர் மதமாக....
காஷ்மீர் என்ன காபூல் என்ன‌
கருணை கண் கொண்டு நோக்கிட‌
அயோத்தி என்ன ஆப்கான் என்ன...
பாபர் மசூதி இராமனுக்கென்றால்
பாவப்பட்ட மனிதா‍- நீ
இடித்த அன்றே அவர் இறந்திருப்பார்...
அக்பரும் இராமரும் ஓர் இனம்
இருவரின் இரத்தமும் ஓர் நிறம்
இருப்பினும் உனக்கேன் வெறி குணம்...
இருவரும் இணைந்து ஒன்றனால்
இறந்தவர் மீண்டும் உயிர் பெறுவார்
இந்தியாவில் அமைதி மலரச் செய்வார்....

உண்மை காதல்.

கண்ண‌சைவில் களி நடனம் கண்ட‌

கற்பனை காதலெல்லாம்,

கால் நூற்றாண்டு கடந்தால்

காணாமல் போவதுண்டு...

உடலின்றி உயிர் சார்ந்த‌

பெண்மையின் கண்மை

கரையும் வேளையில்

கலங்கிய விழிகள்

காற்றில் அனுப்பும் ஒலிகளை

உள் வாங்கி உணர‌

ஊற்றென பெருகும்

உன்மத்த காதலே!

உயிர் உள்ள வரை

உடன் வரும் காதலாம்....

தன்னம்பிக்கை வேண்டுமடி

குழந்தைகள் வாழ்வு உயர்வுற
உன் உயிர் நிலை பெற வேண்டும்...

ஒதுக்கி விடு உலகத்தை
உன்னோடு சிரிக்கும் ஊரிது
உனக்காக அழுவதில்லை ஒரு போதும்..
உன்னைப்பற்றி உனக்குத் தெரியும்

உன் மேல் அன்பு காட்ட
உன்னை விட யாருண்டு?
ரத்த சொந்தமெல்லாம்
ரயில் சொந்தம் போல‌
உடன் வர மாட்டார்
ஊர் போயி செரும் வரை..
உனக்குள் உருவாக்கு ஒரு உலகம்
பின்பு பார்
உன்னை விட அதிர்ஷ்டசாலி யாருமில்லை

ஏனென்றால்
உன் மனதை அறிய
அந்த மகேஷனாலும் இயலாது
பாராட்டு,
அனைவரையும் பாரபட்சமின்றி
அன்பு காட்டு ,
அதை அவர் எதிர்பார்காமல்
இரக்கப்படு,
இன்னொரு ஏசுவாய் எண்ணிக்கொண்டு...
இறுதியாய் ஒன்று மட்டும்
நீ வேறு உலகம் வேறு
எதிர்பாராதே எதையும்
ஏமாற்றத்தை தவிர்க்கலாம்
"என்னை போல்"

சுமைதாங்கி

தேவையறிந்து தேனூட்டும்
தென்றலான தேனி என்னை

தேடி தேடி சொல்லெடுத்து
தேளென நீ கொட்டிடினும்

வலி தாங்கி விழி தூங்கா
இமையாக நானிருந்து

கசிகின்ற நெஞ்சோடு
கசங்காது உனைக்காப்பேன்

பிடித்தவைகள்...

அன்னை தெரசாவின்
சேயாக‌ பிடிக்கும்...
வைர‌முத்துவின்
தோழியாக‌ பிடிக்கும்...
லேனா த‌மிழ்வாணனுக்கு
த‌ங்கையாக‌ பிடிக்கும்...
க‌ம‌ல‌க்கண்ண‌னுக்கு
காத‌லியாக‌ பிடிக்கும்...
ர‌ஹ்மான் இசையில்
பாட‌ பிடிக்கும்....
என் கண்வ‌னுக்கு ம‌ட்டும்
ம‌னைவியாக‌ பிடிக்கும்...
உன‌க்கும் கூட‌
அன்னையாக‌ பிடிக்கும்...
ஆனால்‍‍‍...
இவ‌ர்க‌ள் அனைவ‌ருக்கும்
என்னை பிடிக்குமா???

மறக்க முடியுமா?

நட்பினை நினைவு படுத்த
நாட்காட்டியில் நாளுளதாமே!
நான் அதை மறந்து விட்டேன்...
அகத்தீயில் எரிகையில்
புற‌மிருந்து எனை காத்த
புன் செய் விளை நில‌மே!
உனை நான் ம‌ற‌ந்து விட்டேன்....
பிள்ளை மொழி கேட்ட‌ என்னை
பித்த‌னாக்கி பிற‌ழ‌ வைத்த‌
த‌ங்க‌ த‌மிழ் மொழியே!
உனை என்றோ ம‌றந்து விட்டேன்...
என் சித்த‌ம் க‌ல‌ங்கிடாது
நித்த‌ம் ந‌னைத்த‌
நில‌வொளியே!
உனை கூட‌ ம‌ற‌ந்து விட்டேன்....
பாச‌மென்னும் பாச‌க்க‌யிற்றால்
ப‌ன் முறை உயிர் குடித்த‌த்
தென்றலே!
உனையும் தான் ம‌ற‌ந்து விட்டேன்...
ஓ! மறந்து விட்டேன் பார்த்தாயா?
ம‌ர‌ண‌ம் எனை த‌ழுவி
மாத‌ம் ஒன்று ஆன‌தையே!!

என்னைப் பற்றி

என்னை கண் கொண்டு நோக்கிடின்
கண்ணி வெடியாய் சிதறிடுவீர்
காரணம்...

கற்பனை செய்யாத
காரிருள் தேகம்
கனவிலும் வாராது
என் மீது மோகம்...
கூன் விழும் தோள்களோடு
கரு நாக தோல்கள் மூடி,
முகம் சுழிக்க செய்யும்
முன் நெற்றி வழுக்கை...
காணாமல் போனது
கருவிழியிள் 1/4கண்டால் போவது
நம் நட்பில் 3/4...
அகிலத்தை ஆட்டி வைக்கும் உன்னை
அரை நொடியேனும் ஆட வைப்பேன்...
அணு குண்டாய் வந்தே
ஓர் நாளில் அலற வைப்பேன்..

பெண்ணே!

மெட்டி ஒலியால்
என்னை கட்டி இழுத்தாய்..

கொள்ளை அழகால்
என்னைகொள்ளையடித்தாய்..

கூர் விழியால்
என்னைகுத்திக் கிழித்தாய்...

கும்மிருட்டு வேளையிலும்
குலுங்கி அழ வைத்தாய்...

நீ கொடுக்கும் சித்ரவதையில்
சிதறிப் போன என்னை

சீக்கிரத்தில் கொன்று விடு பெண்ணே
உன் அழுத்தமான முத்தத்தால்...!

என்னுள் நான்

சில பொழுது சிரிக்கின்றேன்
பல பொழுது அழுகின்றேன்....
சிந்தை சிதறியே
சிலையாய் சமைகிறேன்....
வன்மம் தழைத்தோங்க
ஜென்மத்தில் சில நாள்
குரூரத்தில் குளிக்கிறேன்.....
குமரன் ஆடிய நெஞ்சத்தில்
சாத்தனை குடி வைக்கிறேன்....
கூடி களித்து மகிழ்கயிலும்
குடைசலில் கூனியாய்
சதி செய்கின்றேன்....
மன்னித்து விடு இறைவா!
மறு பிறவியாவது
மனித பிறவி எடுக்கிறேன்...

ஹைகூ.............

நீ பூப்பெய்தியவுடன்
உன் தாய் கலங்குவதேன்
அவள் மூப்பெய்திய
கவலையிலா?



ஆண்களே!

இம்சை செய்து மங்கையரை
'மேக்மா' வாக்காமல்
அகிம்சையை ஆதரித்து
மகாத்மா ஆக்கிடுங்கள்...



இறந்து விட்ட இதயம்
இன்னமும் துடிக்கிறது
இறங்காத உன் நினைவால்....




முள்ளில்லா ரோஜா
என் மனதில்
முள்ளாய் குத்துகிறது
உன் நினைவு........



உறைய வைத்த ஒற்றை பார்வை
உறங்கையில் வலிக்கிறது
உள்ளமெங்கும்.....



பார்வையால் உயிர் பறிக்க
பாசமென்ன பாசக்கயிறா?



கவியென்னும் கயிறு கொண்டு
கட்டி வைத்தாய் இரு விழிக்குள்......



உருவில்லா உன் மனதை
உற்றுக் கேள்
உள்ளச் சிணுங்களில்
உறைந்திருக்கும் என் குரலும்.....