தலைவர் கலைஞர் அவர்களுக்கு தெரியுமா?

வேலூர் :குடியாத்தம் அருகே, முதல்வர் கருணாநிதிக்கு வேலூர் மாவட்ட பஞ்சாயத்து கவுன்சிலர் கிருஷ்ணமூர்த்தி கோயில் கட்டியுள்ளார்.

வேலூர் குடியாத்தம் பரதராமி நெடுஞ்சாலையில் உள்ள சாமிரெட்டிபல்லியை சேர்ந்தவர் கிருஷ்ணமூர்த்தி (45). தி.மு.க.,வைச் சேர்ந்த இவர், மாவட்ட பஞ்சாயத்து கவுன்சிலர். சாமிரெட்டிபல்லியில் தனக்கு சொந்தமான இடத்தில் 2 லட்சம் ரூபாய் செலவில் முதல்வர் கருணாநிதிக்கு இவர் கோயில் கட்டியுள்ளார்.இரண்டரை அடி உயரத்தில் முதல்வர் கருணாநிதியின் மார்பளவு கற்சிலையை அமைத்துள்ளார். கோவில் முகப்பில் துணை முதல்வர் ஸ்டாலின், அமைச்சர் துரைமுருகன், காந்தி எம்.எல்.ஏ., ஆகியோர் உருவப் படங்கள் வரையப்பட்டுள்ளன. "கேட்டால் கொடுப்பார் கடவுள்; கேட்காமல் கொடுப்பார் கருணாநிதி' என, அங்குள்ள கல்வெட்டில் பொறிக்கப்பட்டுள்ளது. கருணாநிதிக்காக இக்கோயில் கட்டப்பட்டுள்ளது என, கல்வெட்டில் குறிப்பிடப்பட்டுள்ளது.

கவுன்சிலர் கிருஷ்ண மூர்த்தி கூறும்போது, ""முதல்வர் கருணாநிதி ஏழைகளுக்கு உயிர் காக்கும் உயரிய சிகிச்சை அளிக்க மருத்துவக் காப்பீட்டுத் திட்டம், கிராம மக்கள் பயன் பெறும் வகையில் 108 ஆம்புலன்ஸ் வசதி, இலவச கலர் "டிவி', ஒரு ரூபாய்க்கு ஒரு கிலோ அரிசி போன்ற திட்டங்கள் கொண்டு வந்துள்ளார். அதனால், முதல்வருக்கு கோயில் கட்டியுள்ளேன். இங்கு மூன்று வேளையும் பூஜை நடக்கும். ஆண்டு முழுவதும் அனைத்து நாட்களிலும் விசேஷ பூஜைகள் நடக்கும். கோயிலுக்கு வருபவர்களுக்கு மதியம் இலவச உணவு வழங்கப்படும்,'' என்றார்.